DUO KOKO PROSLAVIO DESET LET: “Lepi je osjećaj kad znoš da ljudi cijene tvoj rad do tega da mladenci prebacuju datum vjenčanja…”

Ako ne znote ki predstavlja Duo Koko, forši bolje da preskocete tekst, na kriven ste portalu. Škerac na bondu, Aleks Juričić i Nikola Kršulja su vrhunski harmonikaši koji su na Labinštine postali ‘sinonim’ za dobar štimung i feštu. Sopeju skupa već deset let, pa smo tim povodom odlučili malo poćakulat s njimi…

NAPOMENA: Uredili smo pola intervju na način da smo ga prebacili na standardni hrvatski jezik, a onda se nasmijali sami sebi i pustili cijelog na cakavici. Neke stvari su neprevedive.

Krenimo ozbiljno, kada i kako kreće ‘štorija’ Duo Koko?

Štorija s Duo Koko je počela 2012. Do onda smo svirali zasebno, moremo priznat da smo si bili konkurenti haha…. Krcko me je nazva da ima upit za momačku, dotu i pir, ali da trebaju dve harmonike.

Dve harmonike skupa zvučalo nan je odlično pa smo odlučili prihvatit. Odradili por proba skupa i videli da nan hodi i da se lako prilagođavamo jedon drugemu. Paralelno s tim, zvoli su i mene – također isti upit za svirat, ali dve harmonike i tako je započela štorija o Duo Koko.

Datum 12.05 racunomo ko don kad smo imeli prvu zajedničku svirku, a ime je nastalo spajanjem dva zadnja slova naših nadimki po keh nas si znoju – Floko i Krcko.

Ljudi znoju reći da imate posebnu energiju, u smislu vas dva – koliko je bitno da ‘kliknete’ kad je duo, ili ako su dva kvalitetna „sopca“ (svirača), oni će vajka napravit dobar štimung?

Vjerojatno je presudan faktor taj da smo se znali od glazbene škole i družili s istim krugom ljudi. Mi smo “kliknuli” skoro pa zajno. U početku smo se prilagođavali i svirali kako je prišlo. Jedan vodi, a drugi prati i obrnuto.

Sada, nakon toliko let i bezbroj svirka keh smo odradili neki put je dovoljno da se pogledamo i ‘kimnemo’ s glovu za pjesmu ka re dalje. Dva kvalitetna sopca će napravit štimung, ali veli faktor je i publika ku zabavljaš. Stalno se moraš prilagođavat i pratit ka muzika pasiva, a ka ne.

Iskreno, imate kakov nastup da se ga slabo spametite? Koliko je teško bit profesionalan kad te potegne atmosfera?

Na pocetke trema je bila ogromna. Većinom je bilo dobreh svirkah, ali znalo je bit i manje dobrih. Tokom sake pauze bimo analizirali da li smo dobri, ca ne stima… Ali, ponavljamo, velu ulogu u sen ten ima i publika. Ako oni nisu za feštu tu si u “problemima” jer ne znoš s ku vrstu muziku biš hi zainteresira.

Danas kamo god da pridemo vajka bude neki kega poznoš jer smo s letami upoznali veli krug ljudi i jedon te preporuči drugemu. Mi se na sake gaže trudimo bit čim više profesionalni. Ca je bolja atmosfera, to je za nas poticaj da budemo još bolji.

Ca ste delali u koroni, pustimo financije, ali koliko je s psihičke strane bilo teško toliko manje svirati?

Iskreno, korona nan je prisla k’o ispušni ventil. Leto prvo koroni nan je bilo prebukirano. Od cetrtega do devetega meseca saki vikend udarno i čak smo poceli razmišljat da bimo pustili svirat jer nismo to više mogli pratit.

Gubit noć i drugi don na delo ne re baš, a i leta hode pa je teže podnest neispavanost i umor, haha…

Lakše se oženit, nego vas rezervirat. Koliko po napred ste zauzeti?

Rezervirani smo otprilike devet meseci do leto i pol po napred. Znalo se desit da bi svati prebacili datum samo da njin sviramo. To nan je vela čast i motivacija za napred. Lepi je osjećaj kad znoš da ljudi cijene tvoj rad do te mere.

Deset let je pasalo, još se niste posvadili, još vas ljudi štimojo, kakav je plan za dalje? Do koliko? Do prvega milijuna ili do dvajset let? Ste razmišljali o fešti za deset let? Koliko bi ljudi morali zvat ?

Deset let je proletelo. Gledajući slike kad smo poceli vidi se da smo bili klinci na pocetke, sada smo malo ozbiljniji klinci, haha. Svirat ćemo dok moremo to pratit. Kad budemo videli da više nismo na razine razmišljat ćemo da harmonike obesimo o klin.

Saka generacija ima svoje, tako da polažemo nade va nove generacije ke pridevaju i nadamo se da će oni nastavit dalje sos i zabavljat da se ne zatare lepa tradicija.

Facebook
Twitter
WhatsApp
Email

pročitajte još